4035 hits

Antes de que o domingo 25 o Concello de Melide celebre a súa primeira feira- exposición de gando autóctono galego, o venres e o sábado será o monte o obxecto de debate na vila melidense.
A Concellaría de Medio Rural organiza o venres 23 e o sábado 24 unhas xornadas técnicas que baixo o título Valorización do sector forestal e multifuncionalidade do monte na comarca da Terra de Melide, reunirán en Melide a representantes das tres universidades galegas, técnicos e asesores da Consellería do Medio Rural da Xunta de Galicia e tamén a membros de entidades vencelladas directamente ao asociacionismo forestal, como é o caso da Mancomunidade de produtores de biomasa forestal primaria no sur de Galicia ou a Reserva de Biosfera da Área de Allariz. A concelleira de Medio Rural de Melide, Anabel Ramos, destacou que “serán xornadas abertas e gratuítas –previa inscrición no Concello-, porque queremos impulsar e popularizar as políticas de aproveitamento forestal, que teñen na comarca de Melide un escenario privilexiado”. O venres 23, ás 10h, a alcaldesa de Melide, Socorro Cea, inaugurará as xornadas, que continuarán durante o venres ata as 19h. O segundo día, sábado, o horario será de 10h a 14h. Nestes dous días para o encontro e o debate, abordaranse aspectos como o aproveitamento da biomasa, o valor sociocultural do patrimonio forestal de Galicia, o proxecto para aproveitamento de superficie forestal no Concello de Allariz (aplicable noutros territorios) ou a achega ecolóxica do monte ou os sistemas de aproveitamento establecidos na actualidade, como o Banco de Terras de Galicia –BANTEGAL-.

Todas as persoas que queiran participar nestas xornadas, deberán formalizar a súa inscrición na Concellaría de Medio Rural do Concello de Melide. Posteriormente, o domingo 25, coincidindo coa feira grande do gando en Melide, celebrase no Pazo de Congresos unha feira-exposición de gando autóctono, vacún, ovino e cabalar, que poderá visitarse durante todo o día.

Fonte boletín novas concello de Melide