2980 hits

O Concello de Melide iniciou no mes de xullo unha campaña de recollida de alimentos para enviar ao Sáhara, no marco da colaboración que este municipio ten establecida coa asociación Solidariedade Galega do Pobo Saharauí. O Concello contou tamén coa colaboración da Asociación Cultural Terra de Melide.

Dende ese momento, a través dun bando municipal e tamén da radio local, informouse á veciñanza da existencia dun depósito no que todas as persoas que quixesen solidarizarse coa situación de crise humanitaria que está vivindo o Sáhara puidesen facelo achegando unha doazón de comida. En particular, o Concello de Melide fixo especial fincapé en que se doasen alimentos non perecedoiros e aqueles que máis escasean nese territorio; era o caso das lentellas, o arroz, o aceite ou o atún.
Logo de varias semanas de campaña, o Concello de Melide realizou na tarde de onte un envío a Vigo de máis de cincocentos quilos destes alimentos, que chegarán ao Sáhara a través da asociación Solidariedade Galega co Pobo Saharauí. A través desta asociación, o Concello de Melide colaborou o ano pasado e tamén este ano no programa Vacacións en Paz, a través do cal catro nenos saharauís están a pasar o verán con familias melidenses.

A concelleira de Benestar e Igualdade, Casé Rodríguez, encargada do seguimento desta campaña de solidariedade co pobo saharauí, destacou “a exemplar participación da veciñanza de Melide, que demostrou unha vez máis que a solidariedade non entende de razas nin fronteiras”.
Fonte concello de Melide