1780 hits

A Biblioteca municipal de Melide organizou diversos actos para festexar o Día Internacional das bibliotecas que se celebra cada 24 de outubro. Nesta ocasión, os tres colexios de Melide achegaranse á Biblioteca para coñecela mellor, participar en concursos e asistir ao espectáculo teatral “Carlota e Marieta dan a volta ao planeta” da compañia galega de teatro infantil A Loca Motora.

Os primeiros en achegarse ata a Biblioteca Xosé Vázquez Pintor foron os alumnos e alumnas de 5º e 6º de Primaria do colexio Martagona. Alí, foron recibidos pola bibliotecaria municipal, Ánxela López, quen os convidou a participar no concurso Pasapalabra para demostrar o grao de coñecemento da súa Biblioteca municipal.
Os outros dous colexios, o nº 1 e o Mestre Pastor Barral tamén pasarán pola Biblioteca para coñecela un pouco mellor e decubrir que, por exemplo, conta xa con 3.339 socios ou que nos seus andeis xa hai máis de 18.000 libros. Os asistentes tamén puideron ver no mesmo inmoble a exposición de pintura da artista plástica Mavi Lezcano que, baixo o título de “Rapazadas” chega a Melide coa súa colección de cadros cheos de imaxes de nenos e nenas. A exposición estará en Melide ata o 31 de outubro. Fonte concello de Melide