86 hits

Melide acollerá a vindeira semana un curso dirixido aos profesionais de atención primaria, no que se reforzarán os coñecementos e capacidades laborais no ámbito da aplicación dos coidados paliativos. Os encargados de inaugurar este curso, o luns 25 ás 9 da mañá, serán a alcaldesa de Melide, Socorro Cea, e o xerente de Atención Primaria da Xunta de Galicia, Javier Ventosa Rial. A xerencia de Atención Primaria organiza en Melide este curso, dentro do Plan Galego de Coidados Paliativos, que ten por finalidade garantir e mellorar a asistencia á poboación con criterios de continuidade e cobertura as 24 horas do día. Do luns 25 ao venres 29, no Edificio Multiusos, desenvolverase este curso cunha programación de dúas horas diarias, impartidas por profesionais en coidados paliativos procedentes dos departamentos de Hospitalización a Domicilio, Unidade de Coidados Paliativos e Oncoloxía do Complexo Hospitalario Universitario de Santiago, e médicos de atención primaria que son referentes a nivel galego neste tipo de coidados nos seus respectivos campos.
Profesionais do ámbito sanitario de Melide, Arzúa, Boimorto e Santiso participarán neste curso a vindeira semana.