2121 hits

A alcaldesa de Melide acudiu esta mañá ao acto de sinatura dos convenios de colaboración establecidos pola Deputación da Coruña con este concello, e no que se materializan tres importantes demandas do equipo de goberno: a adecuación e remodelación interior da Casa da Cultura (340.773,44 €), a adquisición dun camión con plataforma elevadora para o uso da brigada municipal de obras (65.000 €) e a rehabilitación dunha vivenda tradicional para uso museístico en Furelos (60.000 €).

A actuación de maior envergadura é a referida á Casa da Cultura de Melide, á que a Deputación destina, a través deste convenio, 340.000 euros para o seu investimento na adecuación interior do espacio central do edificio na planta baixa, que será empregado como auditorio. Trátase dun espazo diáfano no que se poderán programar actuacións musicais e teatrais, aproveitando a alta calidade do revestimento das paredes, que se realizará con paneis de madeira e un tratamento especial para a refracción do son.
A partida orzamentaria que hoxe asinou a alcaldesa de Melide co presidente da Deputación empregarase por tanto no acondicionamento final do interior do edificio: pavimentación do patio, escenario con tarima de madeira, instalación eléctrica, iluminación, ventilación, etc. Tamén nesta partida se inclúe a colocación de 303 butacas, e tres máis para persoas con mobilidade reducida. En total, a parte baixa da Casa da Cultura de Melide ocupará 450 metros cadrados, dos cales 150 corresponden ao escenario.


Modernización da flota municipal
A segunda achega provincial plasmarase na adquisición dun camión con plataforma elevadora para o seu uso por parte da brigada municipal de obras, en concreto dos electricistas. Trátase dun camión de motor diesel de 130 cv que contará cunha pluma telescópica de aceiro para realizar traballos ata a unha altura de 15 metros e cunha cesta con capacidade para dúas persoas e estabilizadores laterais hidráulicos. A adquisición deste camión “servirá –segundo avanzou a alcaldesa de Melide-, para mellorar a seguridade dos traballadores e optimizar os traballos de reparación e mantemento que realiza a diario o servizo municipal de obras”. A Deputación achega unha contía de 65.000 euros.

Rehabilitación de vivenda en Furelos
O outro convenio asinado hoxe entre Melide e o ente provincial é o relativo á rehabilitación dunha vivenda tradicional que se atopa a carón da ponte de Furelos, en pleno Camiño de Santiago. A Deputación da Coruña destina para os traballos de rehabilitación e musealización deste inmoble 60.000 euros, que segundo a alcaldesa, Socorro Cea, “converterase no primeiro punto turístico do Concello de Melide pola súa privilexiada situación en Furelos”.
Fonte boletín concello de Melide