O concelleiro de Promoción Económica e Turismo, Antonio Díaz, destacou que “quixemos xunguir dous valores históricos de Melide, como son o propio Museo e a prestación do servizo de oficina de turismo sobre o Concello, nunha mesma instalación”. Nestes momentos, unha técnica en turismo atende cada día aos visitantes, que non só son peregrinos, senón persoas que escollen Melide como punto de destino na súa visita a Galicia, ou mesmo procedentes de turismo interior.

O concelleiro Antonio Díaz destacou “o notable incremento na demanda do servizo de información turística en Melide, que se demostra coas cifras: 12.700 visitantes pasaron pola oficina no ano 2009”. A concellaría de Turismo que dirixe o edil nacionalista editou ademais varios folletos informativos cos principais reclamos turísticos do concello de Melide, e tamén con aqueloutros reclamos menos físicos pero igualmente demandados, como é o caso da repostería tradicional melidense, que fala desta zona alén das súas fronteiras.

Para que este despegue de Melide como valor turístico, o Concello de Melide multiplicou por 10 a axuda municipal ao Museo, encargado da vertebración da actividade turística municipal a través da oficina de turismo. O concelleiro Antonio Díaz fixo referencia a que “o anterior goberno municipal asignaba 500 euros anuais de subvención ao Museo, e este goberno destina 6.000 euros anuais, pois só así, tomándose en serio a importancia de Melide como valor turístico, é posible realizar unha política rendible tamén a través do turismo. As máis de 12 mil visitas anuais así o garanten”.

Dende o Concello agardan que co comezo do Ano Xacobeo as visitas a Melide se incrementen aínda máis durante este 2010.

Fonte boletín do Concello de Melide.