1721 hits

O equipo de goberno de Melide vén de saír ao paso das que cualificou como “graves e insidiosas acusacións vertidas á prensa polo grupo da oposición”, en relación ao cobro dos recibos do lixo. A voceira do Partido Popular, Ángeles Vázquez, afirmaba en varios medios que o Concello “deixaría de ingresar 300.000 euros polo esquecemento da alcaldesa de remitir á Deputación o padrón actualizado do lixo”.

En relación a estas graves afirmacións, o voceiro do goberno local, Antonio Díaz, afirmou que “o Concello de Melide non vai perder nin un só céntimo en relación a este tema”.


O concelleiro nacionalista explicou que “o Concello xa informou á Deputación no mes de agosto de que, debido a varias problemas técnicos graves sufridos nos últimos meses, decidiuse remitir á Deputación da Coruña o padrón  actualizado dos recibos do lixo a finais deste ano, para que a entidade provincial poida tramitar o seu cobro no primeiro trimestre do ano novo”.

O portavoz do goberno melidense insistiu en que “en ningún caso este aprazamento do cobro suporá ningún tipo de incremento no custo dos recibos para os contribuíntes”, e cualificou de “insidiosas” as declaracións do Partido Popular, xa que “son falsas e só procuran confundir á cidadanía con mentiras”, polo que lle solicitou ao grupo da oposición “respecto á veciñanza que os escolleu como representantes no Concello do que forman parte”.

Fonte concello de Melide