747 hits

PP, PSOE e BNG de Melide acordaron por unanimidade esta mañá trasladar á Xunta de Galicia o interese do Concello de Melide no próximo reparto dos Grupos Municipais de Intervención Rápida –GRUMIR-.

En datas recentes, o equipo de goberno, a través do primeiro tenente de alcaldesa, Manuel Prado, remitiu un escrito á Dirección Xeral de Emerxencias solicitando o GRUMIR para Melide, que xa estaba previsto –con seis membros- na modificación prevista polo bipartito da Xunta pero que finalmente non chegou a materializarse.


Conscientes da importancia que ten esta dotación de asistencia urxente para un Concello como Melide, cabeceira de comarca e que na actualidade conta unicamente cunha asociación de voluntarios de Protección Civil, a alcaldesa, Socorro Cea, convocou unha Xunta de Voceiros para esta mañá de martes, a fin de acadar o apoio unánime dos tres grupos da corporación melidense.
O Partido Popular apoiou durante este encontro a iniciativa de trasladar á Xunta o interese do Concello pola dotación dun equipo de GRUMIR. A rexedora nacionalista, Socorro Cea, afirmou que “nun aspecto tan importante coma este, no que están en xogo as garantías de seguridade da veciñanza, quixemos acadar o consenso total dos tres partidos políticos, de acordo en que o GRUMIR para Melide non pode esperar máis”.
Fonte concellodemelide.org