2729 hits

O Concello de Melide está a promover unha nova campaña de solidariedade humanitaria en beneficio da poboación do Sáhara Occidental. Respondendo á chamada da Asociación Solidariedade Galega co Pobo Saharauí, o Concello vén de emitir un bando municipal no que solicita á veciñanza a súa achega solidaria a través da doazón de alimentos para remitir á poboación do Sáhara Occidental, onde se rexistra preto de 200.000 persoas que viven en campamentos de refuxiados no deserto.

A chamada á doazón de alimentos está centrada en catro tipos de produtos: atún, aceite de oliva, lentellas e arroz. Tal e como se indica no bando municipal, todas as persoas que queiran facer a súa contribución á chamada de axuda humanitaria poden depositar os seus alimentos na Casa do Concello, a través da Concellaría de Benestar e Igualdade que dirixe a nacionalista Casé Rodríguez. O prazo para facer as doazóns está aberto ata o 15 de xullo e contarase tamén coa colaboración da Asociación Cultural Terra de Melide para a difusión desta iniciativa.

Acollidas temporais
Ademais destas accións puntuais de axuda á poboación saharauí, o Concello de Melide participa este verán, por segundo ano consecutivo, no programa de acollidas temporais de nenos e nenas saharauís durante os meses de verán en familias melidenses. O verán pasado foron catro os nenos que pasaron os meses de máis calor en Melide, pero nesta segunda campaña o Concello promoveu a acollida de seis nenos saharauís, que chegarán a Melide a comezos do mes de xullo. Malia que a convivencia diaria dos nenos se realiza con cargo ás familias de acollida, é o Concello o que corre cos gastos do desprazamento e das xestións que fan posible que seis nenos saharauís poidan escapar das duras condicións do verán africano.
Fonte boletín de novas do concello de Melide